7x7.uz | yangiliklar, shou-biznes, sport, avto, kino, moda, seriallar olami

Азиз ватандошлар!
Барчангизни юртимизга ташриф буюрган Наврўз айёми билан таҳририятимиз номидан чин кўнгилдан табриклаймиз.
Хонадонингизни баҳорий кайфият, қут-барака ҳеч қачон тарк этмасин.
Шу кунларга еткизганига шукр!
Байрам муборак!

Бу лаззатли таом қадим-қадимдан пишириб келинади. Сумалак қишнинг охирлари ва баҳорнинг бошланишида истеъмол қилиниб, “илик узилди” ойларида кишига тетиклик ва бардамлик бахш этади. Олимлар бу азалий таом жуда фойдали витаминларга бой эканлигини аниқлашган.
Бу таомни пишириш учун қайроқи қизил буғдой тозаланади. Совуқ сувга ивитилади, 5-6 соатча тургач, текис тахта устига 2 см қалинликда ёйилади.
Майса қатлами унгач, кўтариб қараганингизда таги оппоқ бўлса, демак, тайёр. Сўнг уни олиб кесиш ва бўлакларни гўштқиймалагичдан ўтказиш зарур. Сувини докада сузиб, алоҳида идишга олинади. Сўнг яна қайта-қайта сузиб бошқа идишларга қуйилади.
Қозон яхшилаб қизитилгач, қўй ёғи билан ёғланади. Идишлардаги  шарбатлар (биринчи сузилгани эмас) қозонга қуйилади, сўнг ун солиб, атала ҳолга келгунча кавланади. Таги куймаслиги учун тош ёки ёнғоқ солинади. Оловни пастроқ ёқиб, секин-аста бир маромда қайнатилади. Қозондаги атала қизариб қуйилгач, сув қуйилади (сув уч марта бўлиб-бўлиб қуйилади) ва энг охирида биринчи сузилган идишдаги шарбат солинади-да, қайнатилади.
Сумалак 14-15 соатча бир маромда қайнагач, пишиб-етилади. Қиёмига етиб турган таом бир неча соат дам едирилгач, сумалак кичик идишларда сузиб тарқатилади.

Мана, қишнинг қаҳратонлари ортда қолди. Фасллар келинчаги бўлмиш баҳор қиру далалар, қишлоғу шаҳарлар бўйлаб ўз сепини ёймоқда, табиат уйғониб, чор атроф яшилликка чулғанмоқда. Саховат билан нур сочаётган қуёш, қушларнинг чуғурлаши, майин шабада кўнгилларга илиқлик олиб кириб, кайфиятни кўтаради. Аммо... айнан мана шу палла азал-азалдан “илик узилган”, деб аталади.
Бунинг ўзига яраша сабаби бор албатта. Биз қиш бўйи сархил мева ва сабзавотлар, кўкатлардан етарлича баҳраманд бўлолмаймиз, бу фаслда организмимиз захирадаги қувватини сарфлайди. Баҳорга келиб эса бир оз дармонсиз, тез чарчайдиган бўлиб қолишимиз мумкин. Бу ҳолат танамизда витаминлар ва микроэлементлар етишмаётганидан дарак беради.
Асосан яхши овқатланмаслик оқибатида организмнинг ўсиши, моддалар алмашинуви, ҳужайра ва тўқималарнинг тикланиши узун зарар бўлган витаминларнинг етишмаслик ҳолати келиб чиқади. Шунингдек, ҳомиладорлик ёки болани кўкрак сути билан боқиш, ошқозон-ичак, буйрак, қалқонсимон без касалликлари натижасида ҳам танада витаминлар камайиб кетиши мумкин. Бунда киши ланж, ҳорғин, серуйқу ва сержаҳл бўлиб қолади, диққатини жамлашга қийналади, териси ўзгариб, қуруқлашади, лаб четлари бичилади, иммун тизими заифлашади. Организмда бирор витаминнинг етишмаслиги гиповитаминоз, умуман бўлмаслиги эса авитаминоз, деб аталади. Авитаминоз кам учрайдиган ҳолат.
Агар ўзингизда витамин етишмаётганини сезсангиз, шифокорга мурожаат қилинг, у керакли муолажаларни белгилайди.

Кеча пойтахтимизда «GM Uzbekistan» қўшма корхонасининг янги маҳсулоти – «Chevrolet Malibu» автомобилининг тақдимоти бўлиб ўтди.
Мазкур автомобил 2,4 литр ҳажмли, тўрт цилиндрли 169 ва 263 от кучига эга механик ва автомат узатмали двигател билан жиҳозланган. Кузов конструкциясининг мустаҳкам ишлангани автомобилни юқори тезликда бошқаришда қўшимча қулайлик яратади.
«Малибу» замонавий хавфсизлик тизими ҳамда ўзига хос интерьери билан ажралиб туради. Унинг икки секцияли радиатор панжаралари, кучли ксенон фаралари, светодиодли орқа фаралари бор, изоляция қилинган олдинги рама шовқин ва вибрациянинг салонга киришига йўл қўймайди. Автомобил олтита хавфсизлик ёстиқчаси, бош ва бўйин қисмларини ҳимоя қилувчи хавфсизлик пардалари билан таъминланган.
«Chevrolet Malibu» шу йилнинг июнида сотувга чиқарилади.

16 март куни Apple компаниясининг учинчи авлод iPadи сотувга чиқарилган эди. Ҳисоб-китобларга кўра, уч кун ичида янги планшетнинг уч миллион донаси харидорлар қўлига етиб борган.
Бу ҳақда компаниянинг вице-президенти Филип Шиллер маълум қилди. «Янги iPad – ҳақиқий блокбастер», – деди у хурсандлигини яширмай. Аввалроқ Apple iPad-3 рекорд даражада сотилишини башорат қилган, аммо аниқ рақам келтирмаган эди
Янги планшет сотуви 16 март куни АҚШ, Австралия, Буюк Британия, Германия, Гонконг, Канада, Сингапур, Франция, Швейцария ва Японияда бошланди. 23 март куни эса ушбу маҳсулот яна йигирмата давлатда сотувга чиқарилади.

Юртимизда 21 март иш куни деб эълон қилинди.
Кеча Ўзбекистон Президентининг «Дам олиш кунларини кўчириш тўғрисида»ги қарори эълон қилинди. Унга кўра, жорий йилнинг 21 март – чоршанба ҳамда 25 март – якшанбаси иш кунлари бўлади. Қарорда айтилишича, бундан кўзланган мақсад «аҳолининг дам олиши учун қулай шарт-шароитлар яратиш ва иш вақтидан оқилона фойдаланиш»дир.
Дам олиш кунлари эса 22-24 мартга кўчирилди. Шундай қилиб, кетма-кет уч кун дам оламиз.