7x7.uz | yangiliklar, shou-biznes, sport, avto, kino, moda, seriallar olami

«Адиз ва Диана» дуэтини кашф этган режиссёр эса Баҳром Ёқубов бўлади. Истакларингизга биноан «Супер келинчак» фильмининг ижодкорлари билан бевосита суҳбат уюштирдик.

- Суҳбатимизни асосий саволдан бошласак, кино соҳасига қай тариқа кириб келгансизлар? Яъни «Супер келинчак»кача босиб ўтган йўлларингиз ҳақида гапириб берсангиз?
Адиз:-  Биласизми, кун келиб актёр бўлишим, фильмларда рол ижро этишим хаёлимга ҳам келмаган. Ҳаммаси кутилмаганда содир бўлган: Бухородан Тошкентга келишимга сабабчи отам бўлсалар, санъат институтига ўртоқларимнинг турткиси туфайли ўқишга кирганман. Коллежда ўқиётган вақтларимда ўртоқларим «Адиз, сенда актёрлик қобилияти бор, ташқи кўринишинг ҳам типажга тушади, ўзингни синаб кўр», дейишгач, ҳужжатларимни санъат олийгоҳига топширганман. Санъат институтини тамомлаганимдан сўнг режиссёр Рустам Саъдиевнинг «Наҳотки сен…» картинасида суратга тушдим. Клипларимни ҳисобга олмаганда, бу илк ижро этган ролим эди. Ундан сўнг Баҳром Ёқубовнинг «Ромео ва Жульетта» картинасида Тибальт, яъни Темур қиёфасини яратдим. Орадан озми-кўпми вақт ўтиб «Супер келинчак» фильмини суратга олаётган Баҳром ака мени ҳам синовга чақирдилар. Актёрлар ўртасида бўлиб ўтган ўзаро курашда ғолиб бўлиб, фильмда рол ижро этишга муваффақ бўлганман. Бори шу.   
Диана:- Умуман олганда, мен моделман. Моделчилик соҳасида иш юритаётганимга беш йил бўлди. Кинога келсак, кунларнинг бирида режиссёр Баҳром Ёқубовнинг «Ташландиқ» номли фильмига кичик, аммо муҳим эпизодик ролга таклиф қилиб қолишди. («Ташландиқ»ни томоша қилган бўлсангиз, бош қаҳрамон ролини ижро этган Шаҳриёр дарёда чўмилаётган қизга ташланиб қолади. Ана шу қиз Диана эди, Д.Р.). Хуллас, шундан сўнг «Супер келинчак» фильмига синовга таклиф қилишди. Синовдан ўтдим, кейин нима бўлгани эса томошабинларга маълум…
- Моделчилик соҳасига кириб келишингиз қандай кечган?
- Оиламизда санъаткорлар бор. Аям актриса бўлганлар. Москвадаги МХАТ театрида фаолият юритганлар. Ҳозир у киши уй бекаси. Кунларнинг бирида эрталаб уйғонишим билан «Мен модел бўламан», деб айтганман. Тамом. Шундан сўнг газета харид қилиб, унда чоп этилган эълонлар орқали моделчилик мактабини топиб, аям ва дадамни мени ўша мактабга олиб боришларига кўндирганман.
- Адиз, «Супер келинчак» фильмида дебютант актриса Диана билан рол ижро этиш сизга қийинчилик туғдирмадими?
- Унчалик қийинчиликлар бўлмади. Чунки «Супер келинчак» съёмкаларини бошлашдан олдин Баҳром Ёқубов Дианага актёрлик сирларидан анча сабоқ бериб қўйганди.
- Диана, «Супер келинчак» сценарийсини ўқиб чиқдингиз. Ундан кейин-чи?
- Кейин ижро этишим лозим бўлган рол хусусида яхшилаб ўйлаб кўрдим. Қаҳрамонимнинг болалиги қандай кечган, ўсмирлик даври-чи, умуман ҳаёт тарзи… Ролга киришиш учун мана шу нарсалар, албатта, муҳим рол ўйнайди. Шу боис ўз устимда ишлашдан бўйин товламадим. Қайнонам билан ошхонада бўлган вақтимизда у киши менинг қўлларимга ростдан қаттиқ ургандилар. Чунки ўзим «Саида опа, қўлларимга қаттиқроқ уринг, ҳаммаси ҳаққоний чиқиши керак», деб айтгандим. Яна тандирга нон ёпиш ҳам мен учун жуда қизиқ бўлган, ҳаётимда биринчи марта шу фильмда тандирга нон ёпиб кўрдим.
- Ҳаётда-чи, ўзбек йигитига турмушга чиқишингизга тўғри келса, «Супер келинчак» сингари тош келса кемириб, сув келса симириб, қайнонангизнинг барча «ҳамла»ларига «Кечирасиз, ойижон», дея жавоб қайтариш қўлингиздан келармикин?
- Агар ўзбек оиласига келин бўлиб тушиш тақдиримга ёзилган бўлганида,  ўша кундалик майда юмушлар: уй супуриш дейсизми, нон ёпиш, кир ювиш, қайнонанинг кўнглини олиш – буларнинг барчасини бажонидил бажарган бўлардим. Сабаби бу жудаям қизиқ. Ўзга миллат маданиятини қабул қилиш, уни ўрганиш мен учун қизиқарли бўларди.
- Қандай инсон ҳеч қачон дўстингиз бўла олмайди?
Адиз: - Иккиюзламачи, ўзини ҳурмат қилмайдиганларнинг яқинига ҳам йўламайман.
Диана: Адиз айтгани каби иккиюзламачи ва ёлғончилар.
- «Супер келинчак» фильми қаҳрамони - Сардорга қатъиятли, иродали қиз ёқар экан. Адиз, қаҳрамонингиз сингари сизга ҳам иродали қизлар ёқадими?
- (кулади) Менга камтарин, камгап, ички дунёси ташқи кўринишидан қолишмайдиган гўзал ўзбек қизлари ёқади.
- Демак, севганингиз бор!
- Ҳа, севган қизим бор, лекин санъат оламидан эмас. У мени тушунади. Яна бир сиримни айтиб қўяй: у билан «контракт» тузганмиз. Ўша шартномага мувофиқ у мени партнёр актрисалардан рашк қилмайди. Хуллас… мени тушунади.
- Диана, эшитишимизча, қўшиқ куйлашга қизиқар экансиз, шу ростми?
- Ҳа, рост. Қўшиқ куйлашни хоҳлайман.
- Яқин кунларда суратга тушадиган фильмларингизга саундтрекни ўзингиз куйлаб қолсангиз ажаб эмас…
- Тўғри топдингиз! Шундай фикр ростдан хаёлимга келган. Зиёда «Супер келинчак» фильми учун ажойиб саундтрек куйлади, ундан миннатдорман. У жуда яхши қўшиқчи. Келажакда эса… Хуллас, хонанда бўлиш ниятим ҳам йўқ эмас.
- «Супер келинчак» фильми хитга айланди. Орадан озмунча вақт ҳам ўтди. Таклифларга кўмилиб кетгандирсизлар?
Адиз: - Баҳром Ёқубовнинг «Ичкуёв» фильмида суратга тушдим. Бундан ташқари, Аюб Шаҳобиддинов ва Фаррух Соипов режиссёрлигида суратга олинаётган фильмга ҳам таклиф қилинганман. Съёмка ишлари аллақачон бошланган.
Диана: - Йўқ, сиз айтганчалик таклифларга кўмилиб кетганимча йўқ. Сабаби нимадалигини эса билмайман. Ҳозирча охирги суратга тушган фильмим «Ичкуёв» бўлиб қоляпти. Ишим бир маромда, сокин кечяпти. «Мингта рол таклиф қилишди, ҳаммасини маъқул келмагани учун рад этяпман», деб ёлғон гапиришдан фойда йўқ…
- Диана, «Супер келинчак»даги дуэтингиз омадли чиқди. Режиссёр шу туфайли ҳам иккалангизни навбатдаги мега-лойиҳасига таклиф қилган бўлса, ажабмас. Яқин орада премьераси бўлиб ўтадиган «Ичкуёв» ҳақида қисқача гапириб ўтсангиз?
Диана:  - Фильмда яна қиз ва йигит ўртасидаги муҳаббат тўғрисида сўз боради. Қаҳрамоним бой оиланинг яккаю ягона эрка қизи. Унинг барча истакларини бир зумда муҳайё қиладиган дадаси бор. Аммо қизнинг дунёқараши умуман бошқача. У спорт билан жиддий шуғулланади, турмушга чиқишни хаёлига ҳам келтирмайди. Дадаси унга ўзларига мос бой хонадондан йигитни кўрсатади, лекин қиз рад этади, чунки у ҳаммаси эртаклардагидек муҳаббат асосида қурилишини хоҳлайди.  Кунларнинг бирида қизни ҳам хафа қилиб, ҳам қалбини заб этадиган йигит келади…
Айтишади-ку, «Севгидан нафратгача бир қадам», деб. Фильмда эса нафрат севгига айланиши учун биргина ток зарбаси етарли бўлади…
- Орзуингиздаги рол?
Адиз: - Шундай ролни ижро этишни хоҳлайманки, кўрган томошабиннинг кўзларидан беихтиёр ёш қалқисин. Қаҳрамонимнинг олижаноблигига ҳавас қилсин, унга ўхшагиси келсин.
Диана: - Мен эса тарихий шахсларни гавдалантиришни орзу қиламан. Клеопатра тимсолида намоён бўлсам дейман…
- Дўст тушунчаси ҳақида фикрингиз. Масалан, дейлик, сиз ноҳақсиз. Дўстингиз сизни қўллаб-қувватлаши керакми ёки…
Адиз: - Дўст яхшими-ёмонми кунингда ёнингда туриб, юмушинг бўлса, «лаббай», деб жавоб бериши керак. Ноҳақ бўлганимда ҳам ёнимда туриб, мени қўллаб-қувватлаши керак. Лекин «баҳс» ниҳоясида, секингина айбимни тушунтириб қўйиши лозим. Бу ҳақиқий дўстнинг иши.
Диана: - Сен ноҳақ бўлганингда дўст хато қилаётганингни тушунтириш керак. Ёнингда ким бўлишидан қатъи назар. Ана ўшанда менга у ҳақиқий дўст бўла олади.

Рўмол ғояси Баҳром Ёқубовдан чиққан…
Диана: - Фильмга тайёргарлик жараёни бўлаётган кунлар эди. Нимадир бўлиб, мен суратга олиш майдончасига рўмол ўраб бордим. Баҳром Ёқубов мени кўриши билан «Қандай яхши, худди шундай суратга оламиз», деб туриб олдилар. Рўмол ўрашим  бу Баҳром Ёқубовнинг ғояси.
Рўмолни ўзига хос тарзда ўраб қўйган инсон эса дизайнер Артём Дробишев бўладилар.

 «Супер келинчак» режиссёри Баҳром Ёқубов:
- Яқинда «Ичкуёв» номли янги картинани суратга олдим. «Супер келинчак» сингари бу фильм ҳам жиддий комедия жанрида суратга олинди. Картинада жиддий инсонларнинг кулгили ҳолатга тушганига гувоҳ бўласиз. «Супер келинчак» фильмидан кейин картина давомини суратга олиш ҳақида таклиф битилган жуда кўп мактублар олдим. Аммо «Ичкуёв» «Супер келинчак»нинг давоми эмас! Улар хусусияти билан эмас, асосан жанр жиҳатдан бир-бирига ўхшайди. Адиз Ражабов ва Диана Ягафарова жуфтлиги менга маъқул келгани учун уларни биргаликда бошқа бир воқеа қаҳрамонлари тимсолида кўришни хоҳладим. «Супер келинчак»да бош қаҳрамон қайнона, яъни Саида Раметова эди. Фильм давомида унинг ички кечинмалари, ўзи билан ўзи курашиши, қаҳри қаттиқ қайнонадан юмшоқ табиатли она, қайнона бўлиб қолгани ўз ифодасини топганди. Агар «Ичкуёв»га яна Саида опани таклиф қилганимда, фильм «Супер келинчак»ка ўхшаб қолиши табиий эди. Шуни инобатга олиб, фильмга Раъно Ярашевани таклиф қилдим. «Ичкуёв» фильми экранга чиққанидан сўнг, март-апрел ойларида «Зирапча» номли картинани суратга олишни бошлайман. Бу фильм ҳақида батафсил кейинроқ ошкор қиламан.  

Диана билан қисқа савол-жавоб:
Блиц-анкета:
Диана Ягафарова.
1990 йил февралда Тошкентда туғилган.
Модел.
Севимли актрисаси: Шарлиз Терон.
Севимли режиссёри: Баҳром Ёқубов.
Алоҳида жиҳати: ҳақиқатгўй.
- Диана, ўз исмингизнинг маъносини биласизми?
- Ҳа, биламан. Қадимги Рим афсоналарига кўра «Диана - Ой ва ов маъбудаси» саналган.
- «Супер келинчак» фильмида миллий таомларимизни маромига етказиб тайёрлашни Интернет ёрдамида ўрганган замонавий келин образини ижро этгансиз. Ўзбек миллий таомларини тайёрлашни биласизми ўзи?
- Албатта! Съёмкалардан бўш қолганимда уйда яқинларим учун таом тайёрлаш менинг жону дилим. Ўзбек ва дунё ошхоналари сирларини бувижоним ҳамда аямлардан ўрганганман.
- Диана нимани ёқтирмайди?
- (ўйланиб) …Пол ювишни, кийим дазмоллашни... Умуман олганда, уй ишлари билан шуғулланадиган ёрдамчим бор. Лекин вақтим бўлди дегунча, юмушларни ўзим бажаришга ҳаракат қиламан.
- Мавҳум нарсалар ҳақида фикрингизни билмоқчи эдим. Дейлик, сизга қандай ранглар ёқади?
- Ростини айтсам, камалакман! Менга ёқмайдиган рангнинг ўзи бўлмаса керак. Модани кузатиб бораман, кундалик ҳаётда асосан қора, қизил, оқ ва сариқ ранглардаги либосларни кияман.
- Моделсиз. Шахсий стилистингиз бўлса керак?!
- Йўғ-э… Либос харид қилишга эҳтиёж сезсам, Олой бозорига бориб, ўзимга ёққан кийимни харид қиламан. Худога шукр, топаётган пулларим эҳтиёжларимни қоплайди. Яна чет мамлакатларда кўп бўламан, аксарият либосларимни ўша ёқлардан олиб келаман. Стилистлардан эса Артём Дробишевнинг либос ва аксессуарлари жуда ёқади… Ўша инсон билан маслаҳатлашиб тураман…
- Диана, ҳаётингизда севги-муҳаббатга ўрин борми? Севганмисиз?
- Севганман. Муҳаббатим соҳиби ҳозир ёнимда.
- Муҳаббатни қандай тушунасиз?
- Мураккаб савол… Муҳаббатга бир сўз билан таъриф бериш қийин. Муҳаббатни улкан меҳнат, деб тушунаман. Севган инсон ўз устида тинимсиз ишлашга, севганини тушунишга, уни бор камчиликлари билан қабул қилишга, келишувларга бора олишга қодир бўлиши керак. Муҳаббат фақат тотли висолдан иборат эмас, бунда айрилиққа, ҳижрон аламларига, кўз ёшларга ҳам ўрин бор. Севги… шунчаки ажойиб туйғу!
- Фикрингизга қўшиламан! Айтинг-чи, муҳаббат учун ўз касбингиздан воз кеча олармидингиз?
- Йўқ, бу нарса бўлиши мумкинлигини ҳатто хаёлимга ҳам келтирмайман. Севган инсоним менга бундай талаб қўймаслигига аминман. Шундай бўлган тақдирда ҳам ўз касбимдан воз кечмасдим. Чунки мен ҳам инсонман, мустақил шахсман. Келажакда шунчаки кимнингдир рафиқаси бўлиб қолмаслигим керак. Бу ҳаётда ўз ўрнимни топишни, йиллар ўтиб «Сен ҳаётда нималарга эришдинг?», деб савол беришса, амалга оширган ишларимни қўрқмасдан санаб беришни хоҳлайман...

Суҳбатдошлар: Дилшода РАҲМАТОВА, Нигина ШОЕВА.