Шифокорлар Элифни жарроҳлик столига ётқизадилар. Полициячилар томонидан таъқиб қилинаётганига қарамай, Пўлат шифохонага кириб келади ва Элифни кўради.
Полициячилар Пўлатнинг шифохонада эканлигини билиб, атрофни ўрай бошлайди. Ҳикмат келиб, Пўлатни дарҳол бу ердан кетишга ундайди. Ноилож қолган Пўлат унга эргашади. Коридорда уларни полициячилар кўриб қолади. Пўлат ва Ҳикмат полициядан қочиб, пастки қаватга тушадилар. Пўлат “морг” деб ёзилган хонага кириб, яширинади. Ҳикмат эса Элифнинг укаси Эренни топмоқчи бўлиб, юқорига кўтарилаётганда, полициячилар томонидан тўхтатилади. Полициячилар дарҳол Ҳикматни кишанлаб, уни сўроқ қилиш учун олиб кетади. Йўлда Эренни кўриб қолган Ҳикмат, уни қучоқлаб ўпади ва секинкина “моргда”, деб шивирлайди. Эрен Ҳикмат нима деётганини дарҳол англайди.
-Неча ойдан бери қидираётган одамимиз ҳозир шу бинода,-дейди полиция бошлиғи ходимларига.-Текширилмаган игнадай ҳам жой қолмасин. Атрофда қанча полициячи бўлса, ҳамма шу ишга сафарбар қилинсин!
Бу пайт Мемати полициячилар томонидан қўлга олиниб, маҳкамага олиб кетилаётган эди. Радиоалоқа орқали бутун полициячилар шифохонага зудлик билан етиб келиши билдирилган хабар Мематини сергаклантиради.
-Қайси шифохонага чақиришаётганини сўраб кўрчи,-дейди Мемати машинани ҳайдаб кетаётган полициячидан. Жавобни ҳам кутмаган Мемати ҳайдовчи полициячининг тўппончасини олади ва унга ўқталади.
-Нима қиляпсан?-дарҳол Мематининг икки ёнида ўтирган полициячилар унинг бошига қуролларини тирайди.
-Агар ҳозир тепкини боссам, ҳаммамиз ўламиз,-дейди Мемати.
Бир оздан сўнг Мемати учала полициячини дарахтга кишанлаб, ўзи эса полиция кийимида шифохонага етиб келади. Шифохонани айланиб юрган Мемати Эренни кўриб қолади. Эрен уни морг томон етаклайди.
Морг олдида икки полициячи киришга ботинолмай турганини кўрган Мемати:
-Сизлар бораверинглар, мен текшириб чиқаман,-дейди.-Тирик одамдан қўрқмаган, ўликдан қўрқамизми?
Полициячилар ундан миннатдор бўлиб узоқлашадилар.
Пўлатнинг шифохонага келганини эшитган Абдулҳай, Эрхан ва Пурмузлар ҳам шу ерга етиб келадилар. Фақат уларни ҳам полиция таъқиб қилаётгани учун, ичкарига киролмай, ташқарида туриб қолишади. Шунда морг эшигидан чиқиб келаётган Эренни кўриб, ёнларига чақиришади. Дастлаб уларни кимлигини танимаган Эрен, яқинроқ келгач хурсанд бўлиб кетади.
-Сизларни Оллоҳнинг ўзи етказди,-дейди Эрен.-Мемати ва Пўлат акалар моргда. Менга ўликлар ташийдиган машина топишимни тайинлашди. Шифохонадан чиқишлари керак, атроф тўла полициячилар.
-Сен ичкарига кириб, уларни тинчлантир,-дейди Абдулҳай Эренга.-Биз бир йўлини топамиз.
Бир оздан сўнг морг эшиги олдига тез ёрдам машинаси келади. Ичидан мотам либосини кийиб олган, кўзларидан бошқа жойларни рўмол беркитиб турган Эрхан ва Пурмуз тушади. Эрхан машинадан тушубоқ, Пурмузни ура кетади.
-Укангга эгалик қила олмадинг,-аёлларга ўхшаб йиғлай бошлайди Эрхан.-Мен тўя олмадим укамнинг дийдорига. Энди қора тупроқ тўядиган бўлди! Кетди, бизни ташлаб кетди! Вой, укам!
Эшик олдида турган полициячи уларни кўп қийнамай, ичкарига киритиб юборади. Ҳадемай ичкаридан полиция кийимидаги Мемати замбилнинг бир томонидан, Пурмуз эса иккинчи томонидан ушлаб чиқиб келадилар. Эрхан эса ҳали ҳам дод-войини тўхтатмаган эди...
Кўзланган манзилга етиб келишгач, Пурмуз Пўлатга муҳим гапи борлигини айтади.
-Буюрганингиздек, Низомиддин Гувенчни ҳар куни кузатдим,-дейди Пурмуз.-Ҳеч қаерга бормайди: ишдан уйга, уйдан ишга. Бундан бошқа на бир ерга бориб овқатланади, на бошқа одам билан учрашади.
-Ишдан уйга, уйдан ишга дегин?-ўйланиб қолади Пўлат.-Ғайритабиий ҳеч нарса сезмадингми? Бу одам ҳеч қачон бундай қилмасди, деган воқеа бўлмадими?
Пурмуз бир оз ўйланиб, жавоб беради.
-Пойафзал жинниси. Шу кунларда ким пойафзалини кўчада ялтиратади? Билганларимнинг биттаси ўзимизнинг Невзат, иккинчиси эса Низомиддин. Икки ҳафтада бир пойафзал мойловчи дўконга бориб туради. Борганда ҳам узоқ қолади у ерда. Баъзан икки кун кетма-кет борган кунлари ҳам бўлди.
-Дўконда яна кимлар бор?-сўрайди Пўлат.
-Низомиддин келган пайтда ким борлигини билмайман,-дейди Пурмуз.-Аммо бошқа пайт бориб, пойафзалимни тозалатдим. Иккита гунг хизматчи бор. Ҳеч нарсага тушунмай, қайтиб чиқдим.
Ойша Нур тайёрлади.
|
Сериаллар оламида 
